''Սիրեցէք զիրար'' (Յովհ 13, 34)` Գերյարգելի Գէորգ Վրդ Զապարեանի խորհրդածութիւնը։

Ի՞նչ  պատգամ  պիտի  տայիք  ձեր  մահուան  անկողնին  շուրջ  գտնուող ձեր սիրելիներուն: Հոգին  աւանդող  մարդուն  վերջին  խօսքերը  կը  յայտնեն  իր  կամքը  եւ  իր կարեւոր յանձնարարութիւնները:

Երբ  Յիսուս  իր աշակերտներէն  խնդրեց,  որ  զիրար սիրեն,  տեղեակ  էր,  որ  իր  մահուան ժամը  հասած  էր:  Ուստի,  ուզեց  իրենց թողուլ  այս  «նոր  պատուիրանը»  իբրեւ  հոգեւոր  կտակ  (Յովհաննէս  13,  34),  որուն  համաձայն  անոնք պարտին  ձեւաւորել  իրենց  կեանքը,  որպէսզի  աշխարհը  իմանայ՝  թէ իրենք իր աշակերտներն են:

Միթէ՞  Յիսուս  գիտէր,  որ  իր բոլոր  առաքեալները  մեղաւոր  էին:  Միթէ՞  գիտէր,  որ  բոլորն  ալ  միտումնաւոր ձգտումներ  ունէին:  Ա'նպայման  գիտէր:  Սակայն,  ճանչնալով  հանդերձ մարդկային  տկարութիւններն  ու  փառամոլութիւնները՝  ան  իր  առաքեալներուն պատուիրեց,  եւ,  այսօր,  մեզի  կը  պատուիրէ,  որ  իրար  սիրենք:  Նման պատուիրան մը կը բխէր իր անհուն մարդասիրութենէն:

Առ այդ, պատրուակները մէկդի դնելով' մեր սէրը չզլանանք ոեւէ մէկուն,  զոր  Աստուած  մեր  ճամբուն  վրայ  կը  դնէ,  կամ  զայն  չվերապահենք  լոկ  մեր սիրելի  անձերուն:  Եթէ  Յիսուս  սիրած  ըլլար  միմիայն  իրեն  ընկերացող բարեհոգիները,  այն  ատեն  Պետրոսի,  Մարիամ  Մագդաղենացիին,  Յովհաննէսին  ու  Յակոբին  նման  անձինք՝  իր  հետեւորդներու  շարքէն  դուրս պիտի մնային:

Չթողունք,  որ  մեզի  դէմ  գործուած  յանցանքները  մեր  սէրը  մարեն:  Եթէ Յիսուս  ոխ  պահած  ըլլար  իրեն  նկատմամբ  թակարդ  լարողներուն,   զինք զրպարտողներուն,  չարախօսներուն  եւ  ամբաստանողներուն՝  ինքզինք  զոհելու ոչ  մէկ  դրդապատճառ  պիտի  ունենար:  Սակայն,  ան  զանց  ընելով վրէժխնդրութեան  զգացումը՝  ուզեց  անհունօրէն  սիրել  իւրաքանչիւր  մարդ արարած, առանց խտրութեան:

Սիրոյ  առաքինութի'ւնն    է,  որ  տարբեր  իմաստ  ու  բովանդակութիւն  կու տայ մեր ապրելակերպին:

Յիսուս  գիտնալով,  որ  մարդոց  մեղքը  եւ  մեղքին  պատճառած պառակտումները  յառաջ  կու  գան  սիրոյ  պակասէն՝  պատուիրեց,  որ  զիրար սիրենք, որպէսզի քանդուի մեղքին թագաւորութիւնը:

Ուստի,  սիրով  ապրինք  ու  վարուինք,  նախ  մեր  ընտանիքի պարագաներուն  հետ,  ապա՝  մեր  շրջապատին  հետ,  մեր  մերձաւորին  հետ  եւ բնապահպանումի  գծով՝  բնութեան  հետ:  Չթողունք,  որ  տարակարծութիւնները

տեղ  գրաւեն  մեր  շրջանակէն  ներս:  Եթէ  սիրով  եւ  ազնուութեամբ  սատարենք հանդուրժողութեան,  փոխըմբռնումի,  ներողամտութեան  եւ  հաշտութեան,  պիտի  տեսնենք,  որ  մեր  ընկերութեան  դէմ  ծառացող  մարտահրաւէրները հետզհետէ պիտի նուազին եւ ոչնչանան:

Հ. Գ. Զ